थप्रेक (तनहुँ), मंसिर १८ - छेउको तस्बिरले खास केही अर्थ राख्ला ? सम्भवतः राख्दैनथ्यो, यदि उनी आम नेपाली ग्रामीण महिला थिइन् भने । तर उनी हुन्- फिनल्यान्डकी अन्तर्राष्ट्रिय विकासमन्त्री हाइडी हाउटाला । फिनल्यान्ड सरकारको अनुदानमा सञ्चालित खानेपानी अवलोकन गर्न शनिबार
यहाँ आएकी उनले पुरानो कुवाबाट सञ्चालित धारामा पानी भरी डोकोमा बोकेकी हुन् ।
गाग्रीसहितको डोको बोकेर केही पाइला चाल्न खोजेकी उनी अघि बढ्न भने सकिनन् । भनिन्, 'ओहो यहाँका मानिसले पानीकै लागि खेप्नुपरेको सास्ती धेरै रहेछ भन्ने मेरो सानो अनुभवले देखाइसक्यो ।' त्यसपछि उनले डोको बिसाइन् । मन्त्री हाउटालासहित फिनल्यान्ड र नेपालका करिब २ दर्जन उच्च अधिकारीहरू करिब १५ मिनेट हिँडेर थप्रेक काठेपीपलका करिब ३५ घरले उपभोग गर्ने उक्त कुवा हेर्न गएका थिए । यात्राकै क्रममा समेत मन्त्री हाउटालालाई पटकपटक उनका सहयोगी र पश्चिम नेपाल ग्रामीण खानेपानी तथा सरसफाइ आयोजना तनहुँकी इन्जिनियर रुविका श्रेष्ठले हात समातेर हिँडाएकी थिइन् ।
